Մի քաղաքացու օրագիր

Այս անգամ Սկսելան անհավես ու անկազմակերպ էր՝ մոտ 40 ջահել (ինձ էլ եմ ջահել հաշվում) հավաքվեցին ավանդական տեղում՝ Կոմիտասի արձանի մոտ, բայց արձանի շուրջբոլորը դաշնակցական ցուցահանդես էր բացված, որն ուղեկցվում էր Հախվերդյանի երգերի բավականին բարձր հնչողությամբ։ Որոշվեց Սկսելայի «Արի զարգենք պատը» ակցիան տեղափոխել հարևանությամբ գտնվող Սարյանի արձանի մոտ (Վերնիսաժի տարածք), քանի որ Սկսելայի ժողովրդի կարծիքով Հախվերդյանի երգերը կխանգարեին ակցիային։ Անկեղծ ասած կարծում եմ, տեղափոխվելը ճիշտ քայլ էր, ավելի շուտ ելնելով այն նկատառումից, որ Սկսելայի աղմկոտ ակցիան հաստատ կխանգարեր Հախվերդյանի՝ ինձ համար այնքան սրտամոտ երգերին։

Ինչևէ, մի քանի «տաքացնող» խաղ–կոչերից հետո մնացած 25-30 հոգի ջահելները (ինձ էլ եմ ջահել հաշվում) կիսաշրջան կազմած հավաքվեցին լարաքամվող գիթառիս չորս բոլորը՝ նվագում էին ով և ինչ պատահի… Աչք ու ականջ էր ծակում մասնակիցների ճաշակի տարբերությունը՝ հիմնականում հնչում էր այն, ինչ կոչում են ռուսական ռոք (ես լուրջ պրոբլեմ ունեմ այս բառակապակցության հետ կապված, քանի որ գտնում էմ, որ ռուսական ռոք ասվածը գոյություն չունի, եթե չհաշվենք Գորկի Պարկը)։ Մեկ մեկ հնչում էր Բիթլզների օրհնված երաժշտությունը, Նիրվանան և Մետալիկայից մեկ երկու նման–նմանակում։ Կարծում եմ ակցիան հաջողվեց՝ անձամբ ես հիացած եմ… Արոնյանի հաղթանակով` 4։2 հօգուտ մեր շախմատիստի հաղթանակի, որին հետևած սիմվոլիկ հրավառությունն էլ հենց ազդարարեց Սկսելայի հերթական ակցիայի ավարտը։

Հենց նոր իմացա, որ խուզարկում են ՀՀ նախկին արտգործնախարար Ալեքսանդր Արզումանյանի և նախկին պաշտպանության փոխնախարար, արտադրական ենթակառուցվածքների համակարգող նախկին նախարար Վահան Շիրխանյանի բնակարանները։

Հետաքրքիր քվեարկությունների հանդիպեցի այստեղ, և ամենակարևորը՝ բազմամարդ քվեարկության, չնայած դատելով քվեարկության սկրիպտի պարզունակությունից այն կեղծելը իրենից մի մեծ բան չպետք է ներկայացնի։ Մեկից տալիս եմ քվեարկության արդյունքները.

Ըստ Ձեզ, ՙԲարգավաճ Հայաստանՙ կուսակցությունը ինքնուրույն ուժ է, թե՞ իշխանությունների կողմից վերահսկվող։
(ակտիվացված է՝ 2007-03-20 21:42:14)
Քվեարկման արդյունքները

Փաստորեն ԲՀԿ–ն՝ որի Գյումրիի տարածքային կառույցը այսօր 14 հազար վիճակախաղի տոմս էր բաժանել Գյումրիում, որպեսզի “մարտը շահած զորավարի տեսքով” քաղաք մտնող Դոդին մարդու տեղ դնող ու դիմավորող լինի, կոնկրետ այս քվեարկության մասնակցողների կարծիքով լուրջ կուսակցություն չէ, լուրջ չէ և կուսակցություն էլ չէ… փոխարենը՝ Բարգավաճ է և ուրեմն՝ բոլորս դեպի ընտրություններ։

ՀԳ՝ հիմա կասեք բա էգ ու որձ առյուծներն ի՞նչ կապ ունեին գրածիս հետ։ Լավ է, որ հիշեցրեցիք, թե չէ մոռանալու էի, հա… ուրեմն երեկ, Գագիկ Դոդ Ծառուկյանը երեկ մեր չեմպիոն ծանրամարտիկներին մեկական մեքենա նվիրեց, ու ասաց հիշարժան խոսքեր՝ ոնց որ առյուծի որձն ու էգը նշանակություն չունի, այնպես էլ ծանրամարտիկի։

Գյումրիում ստեղծվել է նախընտրական վերջին շաբաթվա, քվեարկության եւ քվեների հաշվարկի գործընթացների Արագ Արձագանքման Շտաբ՝ Գյումրիում գործող Ժուռնալիստների «Ասպարեզ» ակումբ եւ Գյումրու Ուսանողական Խորհուրդ հասարակական կազմակերպությունների կողմից։

Շտաբի խնդիրեների մեջ մտնում է մայիսի 12-ին դիտորդական առաքելությամբ մոնիտորինգ իրականացնելը Գյումրու ընտրատեղամասերում, պարբերաբար տեղեկություններ հավաքել եւ տարածել քվեարկության եւ քվեների հաշվարկի մասին, հնարավոր օրինախախտումների եւ հնարավոր կեղծիքների մասին։

Հնարավոր զանգվածային կեղծիքների, ընտրողների ազատ կամաարտա-հայտման նկատմամբ զանգվածային ոտնձգությունների փաստերի արձանագրման դեպքում Շտաբը նախատեսում է դադարեցնել դիտարկումները եւ ձեռնամուխ լինել օրինախախտումների եւ ընտրակեղծիքների դեմ անզեն եւ զանգվածային բողոքի բոլոր հնարավոր եւ նպատակահարման միջոցառումների իրականացմանը. հանրահավաքներ, ցույցեր, նստացույցեր, պիկետներ, երթեր եւ այլն։

Լրացուցիչ մանրամասների համար այցելեք Շտաբի պաշտոնական կայք՝ http://www.asparez.am հասցեով։

Աղբյուրը՝ Lragir.am

Մայիսի 3-ին Երևանի Ազատության հրապարակում տեղի ունեցավ Նոր ժամանակներ, Հանրապետության կուսակցությունների և Իմպիչմենտ դաշինքի համատեղ հրավիրված առաջին հանրահավաքը։ Վերջինը տեղի կունենա մայիսի 9-ին՝ Մատենադարանին հարող տարաշքում։
[]
Բանախոսների ելույթներում հիմնական թեման երկուսն էր. Կոչ ընտրողներին՝ լինել ակտիվ, վճռական և տեր կանգնել սեփական իրավունքներին և կոչ իշխանություններին՝ չկեղծել ընտրությունները, քանի որ դա ոչ միայն քրեորեն պատժելի է, այլ՝ դավաճանություն։

Աղբյուրը՝ A1plus

՚Պահանջում ենք ապօրինի վարչախմբի հրաժարականըՙ, ՚Ազատությունՙ, ՚Իմպիչմենտՙ, ՚Տեր կկանգնենք մեր երկրինՙ ցուցապաստառներով, եռագույն դրոշները ծածանելով, գոչյուններով` ՚Իմպիչմենտՙ դաշինքի, ՚Հանրապետությունՙ եւ ՚Նոր ժամանակներՙ կուսակցությունների անդամները տարբեր ուղղություններից երթով 19:00-ին հավաքվեցին Ազատության հրապարակում, ուր նրանց էր սպասում որոշ քաղաքացիների գնահատմամբ 10 հազարից ավել, իսկ կազմակերպիչների խոսքերով` 30 հազարից ավել քաղաքացիներ: Հանրահավաքը մեկնարկվեց Հայաստանի օրհներգի հնչյունների ներքո` քաղաքացիների բռունցքները վեր պարզած, իսկ ողջ ընթացքում եւ բարձախոսի առջեւ կանգնածները, եւ հավաքված բազմությունը պարբերաբար գոչում էին` ՚Իմ-պիչ-մենտՙ:

Աղբյուրը՝ ես, Ձեր խոնարհ ծառան.
Լավ, ասենք Իմպիչմենտ բարով–խեորվ արեցինք պրծանք՝ երկու ձեռով ու ոտով համաձայն եմ։ Հետո՞…
– Ի՞նչ եք անում ներքին և արտաքին քաղաքականության, իրավական, սոցիալական, տնտեսական ասպարեզներում։

Փաստորեն «Իմպիչմենտ»–ը շարունակում է քայլեր ձեռնարկել ընդդիմությանը միավորելու ուղղությամբ և կարելի է ասել, որոշակի հաջողությամբ՝ մայիսի 3-ի հանրահավաքին, համաձայն այս թռուցիկի, կմասնակցեն Հանրապետությունը, Նոր Ժամանակները և «Իմպիչմենտ»–ը։

Դե ինչ, ինչպես կասեր Սպինոզան, եթե ծանոթ լիներ Հրանտ Թոխատյանի հետ՝ լավ վերջը դա հաստատ լավ սկիզբ չէ, որն էլ իր հերթին չի կարող գործի կեսը համարվել, ոչ էլ գոնե 20-25% ձայն ապահովել…

…ասածս այն է, որ մի տեսակ շատ ուշ են միավորվում ընդդիմադիրները։

Հարց. իսկ ինչո՞ւ հանկարծ հիմա, երբ արդեն այսքան ուշ է, ընդդիմադիրները հանկարծ հիշեցին, որ կարելի է համատեղ հանրահավաք անցկացնել։
Պատասխանում եմ. մեր հարգարժան ընդդիմադիրները վերջապես հասկացան (շաաաատ ուշ), որ նույնիսկ ամենաարդար ընտրությունների պայմաններում իրենցից ոչ մեկը այս ընտրությունների արդյունքում խորհրդարանում ծանրակշիռ ներկայություն ապահովել ի վիճակի չի լինի։ Ավելին, նույնիսկ միավորվելով նրանք չեն կարողանալու լուրջ քանակությամբ մանդատներ ձեռք բերել, հետևաբար իշխանական լծակների հասնելու միակ հույսը մնում է որևէ գույնի հեղափոխություն իրականացնելը։ (Ուշադրություն. պատասխանը հիմնված չէ որևէ լուրջ անալիզի վրա, չի արտահայտում որևէ մեկի կարծիքը բացի անձամբ իմից, և այլն)

Մնում է որոշել, որն է ճիշտ՝ օգնել, թե՞ խանգարել վերջապես համատեղված հանրահավաքողներին…

ՀԳ. Կգնամ էդ հանրահավաքին նայեմ ընտրարշավից դուրս եկած ՀՀՇ–ից մարդ–մուրդ կա՞… որքան հասկացանք ՀՀՇ քաղաքական խորհրդի անդամ Արամ Մանուկյանի խոսքերից, իրենց այդ քայլն արվել էր ընդդիմությանը եւ ընդդիմության ընտրազանգվածը միավորելու նպատակով։

Լևոն Բարսեղյանի «Նարիմանով» պատմվածքը կարդացի մի շնչով, ձեզ էլ եմ խորհուրդ տալիս կարդալ։ Եթե ցանկանում եք, հետո եկեք էստեղ մեկնաբանեք, ես կփորձեմ հեղինակին էլ ներգրավել քննարկումներում։

Ներկայացնում եմ մի հատված, որպեսզի իմանաք ինչի մասին է խոսքը.

Կատվիս անունը Սերժ է: Մտերիմների համար` Սերժիկ: Երբ ինձ բերեցին այս կատուն, դեռ չէր խոսում: Նվիրողն էլ գիտեր, թե կատվի ձագ է` նվիրում է, ու, մանավանդ` իրավունքն ունի այս կատվին նվիրել, չգիտեր կատվի անունը: Մտքով էլ չէր անցնում, թե կատվի նորածին ձագը կարող էր անուն ունենալ: Արդեն ավելի ուշ, երբ կատուն 2 ամսական էր ու մի տրտում ժամի, կարծելով, թե ինձ կարող է սփոփել, սկսեց խոսել ինձ հետ: Դե, ես Բուլգակովի հերոսին հիշեցի, բայց սա այդ դեպքը չէր: Սա արտաքնապես հասարակ, գորշ, սեւ վագրավայել բծերով, մի խոսքով սովորական կատու է, տեսնողների մտքով չի էլ անցնում, թե խոսող կատու է, բոլորովին: Շենքում մուկ չկա: Անդարդ կատու:

Շարունակությունը կարդացեք այստեղ…

Ասում են, որ ընտրությունների օրը նշանակվել մայիսի 12-ին, որովհետև այդ օրն է տեղի ունենալու Եվրոտեսիլ 2007 համերգը, և իշխանությունները հույս ունեն, որ երիտասարդությունը խելոք կգնա կնստի տներում ու համերգ կնայի՝ ցույցեր ու խռովություններ կազմակերպելու փոխարեն։

<a href=”http://bekaisa.livejournal.com/254057.html”>Ասում են</a>, որ իշխանությունները ձեռք են բերել ցույցեր ցրելու հատուկ տեխնիկա, և որ նույնիսկ անցկացվել է դրա փորձարկում, որի ժամանակ ռազմական ակադեմիայի կուրսանտները հանդես են եկել ցուցարարների դերում, իսկ սպեցնազը նոր տեխնիկայի միջոցով հաջողությամբ կատարել է առաջադրանքը։

Ասում են, որ այն բանից հետո, ինչ Սերժ Սարգսյանը փորձել է այցելել մահափորձից հետո հիվանդանոցում պառկած Գյումրու քաղաքապետ Վարդան Ղուկասյանին, վերջինիս տղան, որը նստած է եղել հոր մոտ գոռացել է. «դրան ասեք ներս չգա»։Սերժ Ազատիչը ներս մտնելով շատ մեղմորեն պատասխանել է. «մի հատ փչեմ կչքանաս, լակոտ»։Այժմ էլ ողջ Գյումրիով լուրեր են պտտվում, որ Ազատիչին բարի կամեցողները այնուհետև բռնել-կտրել են Գյումրու քաղաքապետի որդու ականջը(ները), որից հետո վերջինս պլաստիկ օպերացիա է արել և արհեստական ականջներ դրել իրեն։

Ասում են Ստեփան Դեմիրճյանը այս անգամ հետևել է Արտաշես Գեղամյանի պայծառ օրինակին, և բավականին կլորիկ գումարով ծախվել իշխանություններին, շենքով-շնորքով օպոզիցիա խաղալու և ընտրարշավի մասին դրական կարծիքներ ձևավորելու համար։

Ասում են ընտրարշավին մասնակցող երգիչներին տալիս են ամենաքիչը 7,000 դոլար այս-կամ այն կուսակցության հետ մեկ ամիս համերգներով ֆռֆռալու համար։

Այ այսպիսի բաներ են ասում…

ՄԵՍՐՈՊ ՀԱՐՈՒԹՅՈՒՆՅԱՆԸ ներկայացնում է մեր ժամանակը` խտացված մեկ կերպարում. «ԱԲԿԱՅ. ՄԵՌՆԵԼՈՒ ՊԱՐՈՒՆԱԿՆԵՐԸ» գրքում:

Ձեռք բերեք գիրքը ՙԱլեքս-Հով՚ (Աբովյան - 25), ՙԱրտ բրիջ՚ (Աբովյան - 20) գրատներում, ինչպես նաեւ` Մաշտոցի պողոտա - 45 հասցեում գտնվող բուկինիստական գրախանութում:

[...]

Այդ մեղեդին, որ հյուրանոցում մտավ գլուխը, հետո լսել էր նաեւ ճամփեզրի մի խորտկարանում, ուր մտան մի բաժակ ջուր խմելու: Ինքը կատաղեց սարսափելի, երբ երկու հարբած երիտասարդներ մագնիտոֆոնը միացրին բարձրաձայն:

Հեռվից ձայնեց խորտկարանի տիրոջը.
- Էդ երաժշտությունն անջատեք:
Աբկայը համազգեստով էր. եթե անգամ համազգեստով էլ չլիներ, խորտկարանի տերը, թեպետ այդ խորտկարանն իրենց շրջանից շատ հեռու էր, կճանաչեր, լսել էր նրա մասին անջատեց մագնիտոֆոնը:

- Ոնց թե, ախպեր,- գոռաց երկու հարբած երիտասարդներից մեկը,- մենք հաց ենք ուտում էստեղ, ուզում ենք երգ լսել, դու ո՞վ դառար, որ մեր քեֆը խանգարես,- կատարները տաք էր` աքլորացել էին:

Խորտկարանի տերը կարկամեց, հասկացավ, որ վատ է վերջանալու եւ մոտենալով ջահելներին, կամացուկ ասաց. ՙՁեն մի հանեք, Հրամանատար Աբկայն է, թող ինքը գնա, հետո կմիացնեմ՚:

- Ով ուզում ա թող ըլնի,- գոռաց երկրորդը,- մենք պըտի լսենք էդ երգը,- ասաց եւ անցնելով վաճառասեղանի հետեւը, նորից միացրեց մագնիտոֆոնը:

Արյունն Աբկայի գլխին տվեց: Դանդաղ մոտեցավ դեռեւս մագնիտոֆոնի մոտ կանգնածին ու հրամայեց.

- Անջատիր, էսօր դեռ սուգ է, ու ոչ մի տեղ երաժշտություն չի կարող հնչել,- իրեն զսպում էր մի կերպ:

- Ի՞նչ սուգ,- քրքջաց ջահելը,- էն որ Դեւին…

Չհասցրեց շարունակել…

[...]